انتي يا اجمل زهرة غريبه
شعرك سحرك
كلك على بعضك جنني
حتى ملامحك
حتى رموشك
حتى اللون اللي مشفتوش
لون احلامك
احلامك يا جميله ترسملي
خط الحلم اللي راح احلم به
عمري ماشفتك او كلمتك
غير من على بعد كبير
لكن عادي هي حكايتي
زي حكاية شاب فقير
حب صبيه
بس غنيه
ساكنه في قصرها عالي بعيد
راح من حبه
قرب منها
شد الحبل اللي على رقبته
ساب اشغاله
ساب اعماله
راح يحكيلها
على اللي جراله
نط اتشعلق
على سور بيتها
راح مقابلها
بنت رقيقه بقلب بريء
راح يحكيلها
على مشكلته
لقى احلامها
اجمل منه
لقى في عنيها
جرح قديم
راح يحكيلها
نسي مشكلته
لقى نفسه بيحب جديد
لكن ها المره
يا تلميذتي
مبقاش حبه عشق قديم
لا يا حبيبتي
حبه اتغير
بقى من حبه نفسه يطير
بقى بيحس معاها كأنه
اب بيسمع من حبوبته
كل جراحها
نفس يداوي جرح عيونها
نفسه يلملم دمع خدودها
نفسه يكون فارس وكبير
صوره في عقله
عمره ما شافها
بس رسمها
من افكاره وصوتها في عقله
راح يرسمها
طلعت صوره
اجمل صوره
زي ملاك غلبان بيطير
جوه عيونها شاف مملكته
انه يعيش وياها امير
اخ بيعشق
اب بيحمي
او يمكن بكره يكون جٍد
لما تخلف طفل صغير
من واد اجمل منه مفيش
عمره ما كان يتخيل انه
قلبه هيعشق حد جديد
يمكن لو كان من الأول شافها
كان برده هيعرف يا جميله
انه محبش فيها حقيقي
غير انها من الطهر اتصنعت
نفسه يطهر روحه بروحها
يبقى خلاص مش لازم يعني
حب وعشق ورغي كتير
يقدر برده يطهر نفسه
يقدر برده يصلح حاله
لما يحب البنت الحلوه
زي اخوها
برده وابوها
يمكن حتى يقلب نفسه
يتحول حيوان اساطير
تنين ناري
يحمي حبيبته
وعلى اكتافه
يشيلها ويهرب
من ايام مليانه مشااغيل
لكن قبل ما يجري يشيلها
لقى دنيتها
بتضحك ليها
وبتندها لحب جديد
حب حقيقي
صافي ودافي
حب يخلي العقل يطير
راح مستني
يمكن تفرح
يمكن تضحك
يمكن حب العاشق
اللي ناداها
يمحي جراح كانت بتهزه
يمكن يقدر يملى عليها
كل حياتها
حاسس انه عليها اتطمن
وان الواد الأسمر يا جميله
راح يحفظلك
كل حياتك
راح يمسك ايدك برموشه
يعصر قلبك حب وطيبه
يملى عليكي الدنيا بحالها
وهيفرحني بحبه لقلبك
وهيبعتلي شنطه كبيره
فيها ضحكاتك
وانتصاراتك
وابتساماتك جوه عنيكي
وهيثبتلي حبه لقلبك
ويخليني اطمن اكتر
لما هايبعت علبه كببره
فيها تورتايه
اسمه واسمك
اتنقشوا عليها
وصورة فرحك
انتي وهو
والضحكه اهلى ماليه عنيكي
هاضحك وابكي
مش مشكلتك
هاضحك من فرحتي بسعادتك
هابكي عشان مش هاقدر احضر
ولاراح اصور
فرحة عمري
لما البنت الطاهره الحلوه
راح تتجوز
هي اميره
وهو امير
وانا يا ولاد عيل غلبان
عاش واتمنى
يفضل يحكي
عن قصه جميله واسطوره
من اساطير جده وجدتها
عن جنيه حلوه ونغشه
دخلت قلبه
نسته اسمه
وعرف انه
مش راح يبقى
زوج لأميره
لكن راح تبقى الجنيه
هي عروسته
تفرح قلبه
وتملى عيونه
ضحك وفرحه
هي حكايه
غريبه شويه
شاب اتجوز من جنيه
واميره تتجوز دكتور
6 comments:
هههههههههههه
الله الله
عود احمد اخى الكريم
ايوة كدا خلى البوستات تنور بالافراح ماشاء الله
يارب تفرح بيها وتشوف احفادهاايارب وتبقى جدو
ههههههههههههههههههه
كل التحية
اهلاً بيك
حمدا لله علي السلامة
بوست رقيق وقصة جميلة ماشاء الله
دايماً بالتوفيق...
تحياتي
يخرب بيت حلاوتك
حلوة قوي قوي قوي قوي يامذنب
بجد بسيطه سلسه ووضحت الفكره قوي
انت شكلك مصيبه والواحد مش عارف
سلاموووووووووووووز
كلمات اكثر من رائعة
من كتر البهجة اللى فيها حسة ان الكلام بيجرى و يتنطط وانا بقرأه
ربنا يتمملها على خير و يهدى سرها و يخلى حياتهم كلها سعادة و حب و هنا
والاهم يملا حياتهم اخلاص ..
تحياتى لك و لطفلتك و للامير ..
ملحوظة:رجاء ترد على تعليقى اللى كتبته فى "صنعت خائنة بيدى" لان ردك عليه مهم جدا بالنسبالى .. و هيفرق معايا فى حسابات كتير اوى ..
اشكرك على اهتمامك .. ولكن ردك دفعنى لان ارد عليه .. وعذرا ان كنت قد اطلت عليك ..
تحياتى لك..
قرأت ردك هذا عدة مرات .. و كنت آمل ان لا أخيب ظنك فى ..
ولكن الجزاء من صنف العمل الا من تاب و أناب ... و هو لم يتوب بعد ..
منتظرة ما ستكتبه بمنتهى الفضول و الشغف ..
Post a Comment